يا واحد من الموجودين..وفارع من بينا..عقبها..قال الريال اللي تدخل :
ياخوي الريال مب بخاطره تشتري من عنده..اترك الشر..واظهر ..


مقلت عيوني وأنا أأشر على راسي :
حر..ولا بظهر..هو يشتغل هني..والمحل مب محله..محل الحكومه..
سواء اشتريت مشتريت ما يخصه ولا يضره بشي..صح ولا لا..؟!!
وأنا من يوم ما دشيت وهو حاط راسه براسي..
حتى مب أسلوب يمد ايده ويآخذ الكتكات من ايدي..شو ياهل جدامه..
والله الخير اللي عندي ولله الحمد يغطيك من راسك لكرياسك..

ومب اهو اللي يحدد من يشتري ولا اللي ما يشتري..
ما دام عند أي شخص بيزات وحب يتشرى..بيتشرى..يعني لو واحد على قده..وياي يتشرى أنت بتروغه يا أستاذ..؟!!


طالع علي العامل..وهو معصب : أكيد وأنا حر..واللحين تظهر من المكان.. ويا أنا يا أنت..

هني..طالعت عليه..وأشرت صوب الحلويات :
بسير وبتشرى..واشوف فيك ذرة شجاعه..وتحدي..وامنعني..وحزتها أراويك صج يا أنا يا أنت..


( رحت صوب الحلويات..وأخذت اتشرى الحلويات لأخواني..عقبها يا العامل صوبي وهو يدز كتفي :
اطلع برع ..يا وسخ.. )


هني..حطيت اللي بإيدي..وأول ما يا الريال مره ثانيه يبا يفارع بيني وبين العامل ..مديت صوبه الكيس..اللي فيها الحلويات..وقلت له :
لو سمحت ياخوي يود هالكيس شوي..


الريال يا في باله أني بظهر من الكافتريا..
لكنه انصدم..لما شافني ايود العامل من ايده وأصرخ بويهه :
مابي امسح فيك الأرض..علشان ما تتوسخ الأرض..بس اللحين ابي أشوف المسؤول عن المكان..
وأراويك شغل الله يا قوي..

التوقيع

طبعاً..العامل شاد حيله.. :
لا مب ساير وياك لمكان..واللحين تظهر لا اكسر راسك..


ومع ارتفاع أصواتنا يا المسؤول.. اللي أول ما دش..تجدم صوبنا.. ووقف من بينا وقال :
شو بلاكم يا جماعه..؟!!


أشر علي العامل :
يا أستاذ..مسكته وهو يبا يسرق..


هني مقلت عيوني..بقو..وطالعت عليه أنا والموجودين..باستغراب.. وقلت :
شو ..؟!! ألا يالظالم..
ماتخاف الله..اتخسي واعقبي يالقصيص..عيني مليانه يالنذل..
( وأشرت عالموجودين )
أسألهم..هم هني..أنا كنت بسرق ولا قال انت ما عندك بيزات..؟!!


( طبعاً..عقب ما تأكد المسؤول من كلامي..وكلام الموجوديين..تأسف مني المسؤول..وطالع على العامل وقال :
شغلك معاي..وهذا مب أول واحد يشتكي من اسلوبك..وأنا لازم..ارفع عليك تقرير.. )


طالع علي العامل بنظرات.. وهو يدعي علي.. :
الله ياخذ حقي منك يا ظالم..


أشرت صوبه :
أنا ما ظلمتك..ولا أبي اقطع رزقك..أنت اللي ييت صوبي وأنت اللي قليت أدبك علي..
ودعوه من دون حق ما تلحق..ولو تدعي علي لدهر..
أن كنت راعي حق..ربك بياخذ حقك مني..وإذا ما كنت راعي حق..لو دعيت علي لآخر لحظة من عمرك ما بيصيبني..شي..


( طلب المسؤول من العامل أنه يسكت..ويروح صوب الكاشير.. وقاله ان حسابه معاه..عقب.. وبالفعل.. أخذت الكيس من عند الريال اللي أخذ يهدي الوضع.. وعقب ما خذيت اللي اريد اتشراه .. تجدمت صوب العامل..وحطيت الكيس من ايدي حتى يحاسبني.. ومديت ايدي على مخباي.. وظهرت البوك.. وأول ما ظهرته..شفت عين العامل يطالع على البيزات اللي كانت في بوكي بنظره استغراب وأشر صوب الآله..حتى أشوف الحساب..
دفعت البيزات.. وظهرت..رغم أني ما كنت اتمنى يصير اللي صار .. وأول ما ظهرت من الكافتريا..

شفت الشايب يالس على عتبة الرصيف..تجدمت صوبه وأشرت :
هلا يا حجي..

التوقيع

طالع علي بنظره ..وهو ساكت .. تجدمت منه ويلست حذاه :
شو ما ذكرتني..؟!!
أنا اللي كنت وصلتك اليوم عسب سالفة ولدك..وهم بعد شفتك في المشتل..
لحقت تنساني..؟!!



هز راسه : لا..

ظهرت العصير من الكيس وقلت :
تفضل يا حجي..

طالع على العصير..بنظره عقب لزم السكوت..وما رد علي بكلمه وحده..
( يا في بالي انه متكدر أو بينه وبين غازي شي..والأسئله اللي في بالي مزدحمه )

أشرت عليه :
ياحجي..وين سرت اليوم لما وصلنا صوب القبور..؟!! يعني وشلون ظهرت بدون ما شوفك..؟!!

طالع علي..ومارد بكلمه..وظل ساكت..( قلت بخاطري : يالله يا محمد..عيل اسكت احسن لك.. )
عقبها..مارمت اتحمل السكوت.. رديت أسأله السؤال الثاني :
انزين وشلون ييت للمشتل..؟!! شنهو اللي يابك لهناك..؟!! شو علاقتك بغازي..؟!!
ليش كنت تركض وراه..؟!!


طالع علي بنظره تهز الجسم..عقبها قال بطريقة تخرع :
بسك أسإله..


( سكت..وأنا متقفط..ومتفشل لأنه مسويلي طاف..عقبها قام..بدون أي كلمه..وراح )


ومن البعيد شفت أخوي سالم ياي صوبي ركض.. ويودني من ايدي وهو يقول :
دش السياره والحقني عالبيت وهناك نتفاهم على مشكلتك..بسك فضايح اتبعني بسيارتك..
بسرعه..



( في البدايه قلت أكيد يقصد على سالفة العامل..وأكيد انه سمع صوتنا ونحن نتنازع بس ماعليه وشو يعني..؟!! )

التوقيع

(( سالم ))

أول ما وصلنا لمحطة البترول..بطلت الباب وظهرت..ووقفت مع العامل اللي طلبت منه يحطلي البترول..
وشفت من البعيد أخوي محمد يظهر من سيارته..وشوي أول ما ظهر طالع عليه العامل اللي قال:
ارباب هازا في معلوم..؟!!


أشرت صوب أخوي محمد :
تقصد إذا اعرفه..؟!! هيه اعرفه..هذا أخوي..بس ليش تسأل..؟!!

( شفت أخوي محمد يأشر صوبنا من البعيد..عقبها دش الكافتريا.. رديت أطالع على العامل بستغراب )
كمل كلامه بدون ما اطلب منه :
هازا في تعبان في مخ هازا..؟!!


صرخت بويهه :
هـــــــــــي أنت..!! حشم عمرك..هذا صاحي اكثر عني وعنك..شو بلاك تستهبل.. ( عقب مديت له الكرت )

سكت في البدايه..هالعامل..عقبها أخذ الكرت( البطاقة) مني حتى يحطه في الجهاز..وطالع علي بنظره.. عقب ما طالع صوب الكافتريا وقال بكل ثقة :
ارباب..هازا نفر ..كان في يجي يهت بترول..اليوم..بس يشيل كلب كبيـــــــــر..في سيارة مال هوا..وسوى قرقر وايد مع الكلب..بعدين..يشيل الكلب في سيارة مال هوا..


( طالعته بستحقار..على ما قاله..وسويت حركه أن كلامه بالمره مب داش راسي وأشرت بستهتار :
لو سمحت عن الغلط..وما يحتاي أعيد كلامي مره ثانيه..وانصحك لا تعيد رمستك المخبقه هذي لا اطلع عن طوري وأزفك زفه محترمه..شوف شغلك وانت ساكت.. )

سكت العامل لفتره عقبها قال وهو يصرخ علي ..ويأشر على محمد من البعيد بنفس الوقت :
اربااااب شوف شوف هازا ..شوف كلام مال أنا صح..أنا يقول في كلب كبيـــــــــر واجد مو زين..مع اخ مال أنته..
هازاك شوف..مع اخ مال انته يالس يسوي قرقر..أخ مال انته واااجد قرقر
مع هازا كلب..مو زين ارباب..

التوقيع

( صديت ويهي أطالع على محمد..اللي صج..كان يالس مع الكلب اللي شكله حيل يروع..وهو نفس الكلب اللي كان في المشتل ويركض ورى غازي..كانت ملامحه غريبه واااااااااايد ولونه أسود واسنانه اللي يشوفها يقول انها سكاكين ذبح..طويله وحاده
مقلت عيوني اكثر لما شفت محمد يمد ايده ويعزمه على شي..والأهم من هذا يالس يسولف معاه..

تركت العامل..ورحت صوب أخوي..وأنا يالس اتجدم منه..شفت الكلب..
يوقف وعقبها مشى بعيد عن المكان..

تجدمت صوب محمد وأنا متخرع من شكل الكلب .. كنت في البداية ناوي أناقشه بالموضوع اللحين بس قلت احسن في البيت لا نسوي هني فضايح )

ويودته من ايديه وقلت :
دش السياره والحقني عالبيت وهناك نتفاهم على مشكلتك..بسك فضايح اتبعني بسيارتك..
بسرعه..


(خذيت الكرت من العامل..ودشيت سيارتي .. وشفت محمد..يدش سيارته
تحركنا مبتعدين عن محطة البترول..وأخذت أسأل نفسي معقول محمد استوى به شي..؟!!
معقول يكون كلام العامل صج..؟!!
من متى محمد يحب الكلاب..ولا بعد اللي لونهن أسود..؟!!!!!
بس ماعليه..جريب بنوصل عالبيت..وهناك بنتفاهم..)


مسافة الدرب..ووصلنا البيت..وأول ما ظهرنا من السيايير..تجدم مني أخوي محمد..يودت ايده ونحن بندش البيت..وقلت له بأسلوب جاد :
ابتخبرك أنت بعقلك..؟!! شو اللي سويته في محطة البترول هاه..؟!!


عقد حيابينه :
شو سويت..؟!! ما سويت شي..أن كنت تقصد على اللي استوى بالكافتريا اللي في المحطة ..
ترى الريال من أول ما دشيت هو حاطني براسه..ما يبا يخوز عني..
والله أن الشر يطلع من عيونه..قاصدني من الخاطر...


( مافهمت قصده..أي ريال..عن شو يالس يتكلم ..؟!!
بطلنا باب البيت ودشينا الصالة ) وكنت أكمل كلامي :
والله مافهمت كلمه وحده..عن منو يالس يرمس..؟!!
محمد أنا يالس أرمسك عن يلستك جدام.....( وأول ما كنت بكمل كلامي..قاطعنا صوت أبوي وعمي اللي يالسين في الصالة .. طالعت على محمد..وأشرت له أن عقب بننهي السالفه.. )


****************************** ****************

التوقيع

(( محمد ))


لما شفنا أبوي وعمي سالم يالسين في الصالة..يرمسون..رفعنا صوتنا بالسلام..عليكم..

سكتوا شوي.عقب ردوا السلام..وقف أبوي اللي تجدم منا..
وأشرلي بصبعه :
أحمد الله انك كنت صاج..باللي قلته لي..تعرف لو كنت كذبت علي..كنت كرهتك باليوم اللي انولدت فيه..

غمضت عيني بتحسر من معاملته وياي..
ابتسمت ابتسامه وقلت بكل حزن :
أبوي..إذا انت تبا تتهاوش وياي وبس..؟!! مابردك..تفضل هاوش طق اعمل فيني اللي تباه..والله ما اقولك حرف واحد..
بس الله يخليك..الله يخليك..حاسب نفسك على اللي تسويه وياي..صدقني وربي أنك..لو ظليت وياي على هالحاله..بييك يوم..بتلاقيني تركت البيت وصج ماتعرفون عني شي..


تغيرت نظرة ابوي..اللي تكلم عقب سكوت :
شوف يا محمد..أن دورت حد يحبك بهالدنيا ما بتلاقي حد يحبك كثري وكثر أمك..
وأن ييت عالخوف..قلبي كان بيوقف خوف عليك من سالفة خالد..
أنت ماتعرف شو يعني خوف الأب على ولده إلا يوم تعرس..وتجرب..حزتها بتفهم أنك مستعد حزتها..تذبح الكل ولا ولدك يتأذى..
على بالك..شو بيستوي بي لو كنت صج ذبحت خالد..وتمرمطت في المخافر..؟!! خبرني..إذا كنت تعرف..


( سكت وما رديت عليه.. )


كمل أبوي كلامه :
ما كنت ببقى بقوتي شرات اللحين..محمد..أنت وأخوك سالم وحروب ..انتوا عزوتي سند ظهري..أنتوا اساس البيت لا ربي أخذ مني أمانته..
تعرف يا محمد..أنت بالذات أخاف عليك بسبت تهورك لا غير..استوعب للدنيا صح يا ولدي..
ومب كل شي طق وهواش..
الدنيا أخذ وعطا..
والله يا ولدي..ولا شي بهالدنيا يسوى عسب تخسر نفسك وأهلك..ودنيتك وآخرتك يوم تلوث إيدك بالإنتقام..
بسير على غرفتي اللحين بس اللي أبيه منك..شغله وحده..
يمكن قبل عاملتك بأسلوب مب زين..وأنا اعترف وحقك علي يا ولدي..بس اللحين..خلنا نفتح صفحه يديده..وبدون أي مشاكل فكر بكلامي وإذا عندك غير اللي قلته خبرني..


( طالع علينا أبوي..عقب ترخص..لما شاف الكل ساكت..وسار على غرفته.. )
عقبها تدخل عمي سالم بقوله :
محمد..مهما غلط عليك أبوك يبقى أبوك..وهو الكبير..الله يهديك..

التوقيع

طالعت عليه عقب على أخوي سالم :
اشبلاك الله يهديكم..؟!! شو قلت أنا..؟!!
اللحين اللي يسمعك..يقول اني سويت جريمه..بأبوي..وأنا ما سويت إلا الصح..
ياعمي مب عيب اوجه ابوي بمعاملته وياي..بس اسمحلي أنت ماكنت هني ما شفته كم راغني وكم عاملني بقسوه..
ابيه يتعامل وياي شرات أول..كان يعاملني بكل احترام..اللحين..
ما أشوف منه إلا القسوه..والله اللحين عرفت ليش بعض الشباب يضيعون..!!!
الحب الزايد يضيع..وهم بعد القسوه الزايده تضيع ..
اسمحلي يا عمي بس والله لو كنت بمكاني كنت سويت اللي اكثر عن جذي..لكني للحين ماتجاوزت حد الولد بحق أبوه..وحشاني ما أسويها بيوم..أن شاء الله..
واليوم الوحيد اللي خطيت بحقه بس لأنه حدني..يوم كان في بيتك...وضرب سالم بقطعة الطوب..وكان أخوي بين الحياة والموت..هاليوم بس لاغير..
واللحين اسمحولي..أنا تعباااااان حدي وتعبت من النقاش والتبرير..
راسي بينفجر..
برخصتكم..بسير على غرفتي اللحين..


وأول ما درت بظهري عسب أمشي صوب غرفتي..شفت نورة واقفه تطالع علي بنظره..وقالت :
أشوفك اللحين عرفت وين سالم..؟!!

( حطيت ايدي على راسي..من كثر التعب عقبها أشرت صوب أخوي سالم بطريقة تعب وملل : تفضل استلم يالحبيب..أنا تعبت تصبحون على خير أن شاء الله )


تجاوزت نورة..ورحت صوب غرفتي..



****************************** ****************

التوقيع

(( نورة ))

لما شفت سالم يدش البيت وهو يرمس مع محمد..عرفت أنهم كانوا بمكان واحد..بس ليش محمد يكذب علي..؟!! ليش يقولي أنه..ما شافه اليوم..؟!!

عقب مالف محمد وعطاهم ظهره..انصدم بوقفتي وراه..وعقبها طالع صوب ريلي اللي استغرب من اسلوب رمست اخوه له..عني..
لما قال :
تفضل..استلم..



راح محمد..ودش غرفته..وهني..أبوي ترخص واستوت الصالة فاضيه...
طالع علي سالم وهو يبتسم :
هلا بحبيبتي وروحي..هلا بنواري..


خزيته بنظره غير متوقعه..وسرت صوب غرفتنا..واول مادشيت..شفته يدش من وراي وهو يسأل :
شو بلاج..؟!! ليش زعلانه..؟!!

تجدمت صوب الشبرية ويلست على طرفها..بدون ما أرد على سؤاله..تجدم مني..عقب ما صك باب الغرفه..ويلس حذاي..وحط ايده على ايدي وهو يحاول يفهم :
أفا..تزعلين مني يانورة..؟!! انزين ليش..؟!! فهميني..


غطت عيني الدموع..والعبره خنقتني ..قلت له وأنا أخوز ايده عن ايدي :
تحلف بالله أنك ماتعرف وحده غيري..؟!!


سكت لفتره عقبها طالع علي :
لا صراحه..ما أروم أحلف..لأني صج اعرف..غيرج


( مقلت عيوني..وحسيتها صدمة قوية..وكأن طراق قوي ويا على ويهي..وبدت الدموع تغطي ويهي.. أشرت بكل هدوء وأنا أحاو استصنع الأعصاب البارده ) :
يعني تعترف..أنك تخون..



أشر بسبابة أيده اليمين مأكد كلامه :
لا..أنا قلت اعرف غيرج..ماقلت أني اخونج..


حطيت ايدي على خصري :
عيل..؟!! مب يعني تعرف غيري يعني تخوني..؟!! ولا في مفهوم ثاني للخيانه..؟!!
ومنو هذي اللي تعرفها أنا أعرفها ..؟!! شو اسمها ..؟!!! والله أراويكم اثنينكم اللي ما توقعتوه مني..

شفته يبتسم لي وهو يقول بكل ثقة :
هيه تعرفينهن..الأولى أسمها نورة والثانيه أسمها ايمان..عاد اللي عرفتني عليهن أمي..

عصبت أكثر عن قبل :
سالم..مستحيل خالتي تعرفك على بنات شو يالس تقص علي..؟!!


ضحك وهو يرد على كلامي :
والله انها عرفتي عليهن..ولا بعد ابشرج..عرفتني على الطفس محمد وعلى أبو لسان حروب..

( هني سكت..وفهمت انه يقصد انه يعرف غيري واللي هن أخواته وأخوانه..تطمنت صج..ضحكت وأنا الدموع شوهت ويهي بالمره .. وخذيت المخده وفريتها عليه وقلت :
ماحبك ..انزين..!! )


تجدم مني وضحك وهو يحلف :
والله ماعرفت غيرج إلا أمي وخواتي..ولا حشى ما بخاطري اتعرف..
واللي يتعرف ويسوي هالحركات انسان يحب الخيانه..ينسى أن في قلب يحبه ويعشقه يترياه في البيت..
انتي..حبيبتي وغناتي..وابيج تعرفي عدل..سلطانين في ديره مايصير..
وشلون تكوني انتي ووحده ثانيه سلاطين على قلبي بنفس الوقت..؟!!
أكيد ما بيستوي..

التوقيع

انتي وحدج..سلطانة حياتي..( حط ايده على ويهي يباني اشوفه ..وقال : نورة طالعي علي شوي..حطي عينج بعيني وقولي : ما حبك ..حزتها آخذ قشوري وبسير عند الطفس محمد.. واوعدج ما ايي الغرفه إلين ماتقولي تعال يا حبيبي..سلوم )


هني هزيت راسي بدون ماأطالع عليه.. :
لا ما بقولها..وأنت تعرف اني........


سمعته يضحك :
انج شو..؟!! كمليها..؟!! عالأقل اسمع شي حلو على هاليوم اللي كله..تعب بتعب..

رفعت راسي وطالعته وانا اغير الموضوع :
عيل أخوك محمد ليش يقص علي وقال مايعرف وينك وما شافك اليوم..
وحزت مادشيتوا البيت دشيتوا رباعه وتسولفون وكأنكم كنتوا مع بعض..؟!!

رد علي :
أهاااااااا تبي تغيري السالفه..مب مشكله برد عليج..بس تأكدي اني برد لنفس الموضوع وما بهدج إلين ماتقولينها لي انج شو..؟؟
المهم..
صج محمد ما كان يعرف مكاني إلين آخر شي..اتصل علي كان يبي شغله..
وتلاقينا..وعقبها يينا البيت رباعه وهالسالفه يالغالية..
وتطمني كنت ويا الربع بالديوانيه..تبيني اتصلج عليهم وتسمعين بنفسج..بتصل..


( هني من كل قلبي ارتحت صج..رفعت يديني ومسحت دموعي وأول ما وقفت على اساس اغسل ويهي بالحمام الله يعزكم.. شفته ميود ايدي وهو معاندني..بكل حنيه وحب ويقول :
واللحين دوري..بسؤالي..قلتيلي انتي شو..؟!!
ابتسمت من كل قلبي ..وأنا عارفه انه ما بيهد ايدي إذا ما جاوبته..عالأقل..اللي كنت شاكه فيه غلط..وهذا الأهم )

****************************** ****************

التوقيع

(( الجزء الثالث والثلاثون ))


(( شرط الغريب ))


(( محمد ))

في صباح هاليوم..بطلت عيني على أخوي سالم..اللي كان راقد عندي..في شبريته..
وبدون ما اقوم من مكاني..خذيت المخده..وفريتها على ويهه..
وأول مانش وهو متخرع..طالع علي وقال وهو طفشان حده :
شو تبا..وياويهك..؟!!


كنت منسدح على جهة ايدي اليمين..أطالع عليه..وأنا متلحف.. :
داش غرفتي وتسألني شو أبا..؟!!
أنت شو يابك ورزك عندي هني..اريد اعرف ..؟!!
( وأخذت اضحك واطنز وأنا اكمل كلامي ) :
أهااااااااا..لالا فهمتها..أكيد راغتك نورة من الغرفه صح..
خخخخخخخخخخخخخخخ
والله دواك باللي يالسه تسويه فيك تستاااااااااهل انزين..

بطل عينه اليمين..وصك عينه الثانيه أونه يبا يكمل رقاده :
اصصصصصصصصصصص


ضحكت وأنا كل مره افر بويهه شي :
قووول ليش راغتك..؟!!


غطى ويهه بالحاف..متجاهل كلامي
حزتها..قمت من على شبريتي وييت شبريته..وسحبت الحاف..ودزيته..وانسدحت وياه وتلحفنا مع بعض..وقال وهو يسحب الحاف جهته :
اوووووهوووووو شو يابك عندي يعني من كبر شبريتي حاسدني عليها..
سر شبريتك..مسوي زحمه سكانيه وأنا ابي ارقد..
طول الليل مب راقد..خووووووووز ويا خشمك..حشى مب خشم..

التوقيع