.!{ X-MAN }!.

(( الجزء العاشر))



(( خطة الغريب ))



(( محمد يتكلم ))

أول ما خلصنا أنا وسالم هالدوام.. سرنا نوقع على أساس أن إجازتنا بتبدأ من اليوم اللي يليه..
وقبل لانوصل البيت قلت لسالم .. توجه لأي بقالة علشان نتشرى بعض

الأغراض..لأخواني.. وأنا أطالع الدرب..
شفت سالم صف السيارة في نفس الباركن اللي صف سيارته يوم الحادث

المشؤوم.. وأول ما كان بيظهر من السيارة.. مسكت إيده وأنا أصرخ:

سالم.. هالبقالة حشى والله ما دشيتها.. يا تودينا أي بقالة ثانية ولا ردنا البيت.. بلا أغراض وبلا زفت..

طالعني سالم مستغرب لأني من فترة كنت أضحك.. وفجأة أنقلب حالي لحالة هستيرية.. وقال :
ليش..؟‍!!

رديت عليه بأنفعال : أسمع.. لو أنا ثقيل على سيارتك.. بسير وبهدك.. وأكيد بلاقي تكسي.. وبرد البيت..

سكت سالم.. اللي بدأ يفهم السبب يوم طالعني أتلفت للمكان اللي كان معقوق فيه.. يوم الحادث.. وقال :

أفا عليك.. يالطفس.. بنسير.. أي مركز من المراكز مرة وحدة.. مو بقالة..


وحرك سيارته وسرنا مبتعدين عن المكان المشؤوم .. المهم يوم دشينا المركز التجاري.. كنا نتبضع من طابق لطابق..


لفتت انتباهي شغلات.. وأشتريتها المهم..
وأول ما خلصنا وحاسبنا.. ردينا البيت..

وأول ما دشينا.. يا الجيش للهجوم علينا.. وهم أخواني..
بس شنو الحركة اللي سواها سالم..؟!!

شال أختي نورة وحملها وهو يقول.. يا زين أسمج والله.. خذي هالكيس لج..
وشوي راحت تركض لعند أبوي وأمي تراويهم الأغراض..

واللي فجرت أذني من صرخة صوتها ونبهتني أنها موجودة أختي إيمان وقالت: محمد.. وأنا منو بيشلني..؟!!

طبعاً محد يشيلها غيري.. لأن الحبيبة رفعت يدينها لي..!!
المهم شليتها.. وشوي قالت: أنا وين هديتي..؟!!


طالعتها وقلت : أندوج خذي.. حشى يا حبكم للهدايا.. وأنا منو يهديني..؟!!
وحطيتها على الأرض وراحت تغيض أختي نورة بأغراضها..
ويوم ييت أتحرك..

لقيت حد متعلق على اريولي يـيت أطالع..؟!!

تعرفون شنو اللي متعلق بريولي..؟!!

أخوي حارب..كان حاضن أريولي ويقول: أنا أهبك يا مأمد

طبعاً ضحت.. ورفعته فوق وأنا شايله.. وقلت: قول..محمـــد..؟!!

مـــأمد..

لا يا حارب.. قول محمد وبعطيك كيس اللي فيه هديتك..

أنذين ... مـــأمد..


طالعته وأنا أضحك : لا يا حارب.. مــ ـــحــ ـــمـــ ـــــد

قول محمد..؟!!

طالعته.. وشفت دمعتين معلقة بعيونه وقال بصوت حزين :
معلف أقول مأمد..؟!!

قلتله : لا شاطر.. قلت محمد اللحين يالله خذ هديتك يا حبيبي.. وبسته على خده.. ويوم حطيته على الأرض..
شفت الفرحة بعيونه وابتسم وقال: ثــكلاً ..ياطفث..

راح يلحق أخواتي.. يراويهم أغراضه.. أما أنا بقـقت بعيوني وطالعت سالم اللي كان يراقب أخواني اللي كانوا عندي.. وهو ساند جسمه على اليدار.. ورافع وحدة من أريوله رادنها ورى.. وكأنه كان يتمتع..

أشرت بالسبابة على أخوي حارب اللي راح وأنا أطالع بسالم وقلت وأنا مصدوم :
ســـ..... سمعته.. قال طفث..؟!!
أنا طفث..يا ثالم..؟!! أقصد.. يا سالم..؟!!

طالعني وهو يضحك.. وتحرك صوبي وقال :
لا.. أنت مو طفث..!! أنت طفس..

ويوم كان بيسير.. طالعته وقلت: منو علمه هالكلمة..؟!!

رد سالم وهو ميت من الضحك وقال : ابصراحة يا صوبي وقال.. طفث ثو يأني..؟!!


ماعرفت شنو أرد..؟!! فاقلت..طفس يعني..يعني.. يا حلو يا طيب..


يعني أنت يا سالم اللي علمته..؟!!

هرب سالم وهو يضحك .. صوب أبوي وأمي .. وأول ما وصلنا..
يلسنا بأدب قرب أبوي.. وأنا كان بخاطري.. آكل هالسالم..

المهم يلسنا شوي.. وعقبها توجهنا لغرفنا وبدلنا الثياب.. وتغدينا وأرتحنا شوي..

وعقب العصر.. توجهت صوب غرفة سالم.. وأول ما دقيت الباب.. توقعته بينش وبيـبـطل الباب.. لكن تفاجئة أن الحبيب مو بالغرفة..

ويوم سرت صوب أمي أتخبرها عن سالم.. طالعتني بنظرة غريبة وقالت: شنو يدريني فيه..؟!! أشوفه سار صوب أبوك..؟!!

طبعاً تفاجأت على الموقف اللي كان وسرت صوب ما يالسين أبوي وسالم..

بس شكل اليلسة ما تبشر على الخير..


طقيت الباب وأستأذنت أني أدش.. طالعني أبوي وهو مفول وقال :
دش وشوف أخوك العاقل اللي أقدر أعتمد عليه..؟!!

قلت بخاطري.. لا يكون تكلم مع أبوي عن موضوع نورة..؟!!

شوي.. إلا أبوي مسكني من إيدي وقال: دش يا ولدي.. وصك الباب من وراي وقال:

تعال..؟!! وشوف هالأثول شو يقول..؟!!


****************************** ******************** ****************************** *****

التوقيع

[عزيزي الزائر يتوجب عليك التسجيل للمشاهدة الرابطللتسجيل اضغط هنا]

.!{ X-MAN }!.

مشيت وييت صوب سالم ويلست احذاه.. وقلت وأنا أهمس لسالم :
شنو السالفة..؟!! شنو اللي مستوي..؟!!

طالعني وهو متغير لون ويهه.. وأشر لي أسكت..

المهم.. طالعت أبوي وقلت : خير يا الغالي..؟!! شنهي السالفة..؟!!

رد علي وهو معصب : قلت لأخوك ما دامت إجازتكم بدت.. شنو رايكم نسافر..؟!! رد علي : مانقدر..

أهنيه أرتحت.. وقلت لأبوي عفوياً : يا شيخ..؟!! خرعتني حسبت السالفة مو جذيه..؟!!

طالعني أبوي وقال : أكيد أنا الغلطان آخر زماني.. آخذ راي واحد أثول مثلك..

ضحك سالم.. وقال: قوله يا محمد..خبره.. أن السفر هالسنة مو ضروري..
خبره..

طالعت أبوي وقلت : يالغالي السفر اللحين ما نقدر عليه بالذات أنا عندي أشغال بعدني ما خلصتها.. بالمرة.. فشلون نسافر.. ونهد اللي ورانا..؟!!

طالعني أبوي وهو يصرخ وقال :

اللي يسمعكم يقول رياييل أعمال حره .. بس خلاص .. برايكم لو ما تبون السفر..خلاص.. نأجلها هالمرة..

رحنا أنا وسالم.. نحب راس الوالد وقال:

بس خلاص.. أنا حبيت أشاوركم لأني الرسول- صلى الله عليه وسلم – أمر بالشورى.. علشان جذيه ناديت سالم.. وزين أنك ييت على الرغم رايك ما فادني..

ضحكنا أنا وسالم ونحن نطالع في بعض..

وعقب منتبه أبوي أننا يالسين نضحك..

ضحك هو بعد وقال :
تصدق يا محمد على الرغم أنك طفس.. بس حياتي بدونك أنت وأخوك هالأثول... وأشر على سالم..
ما تسوى.. عسى ربي يحفظكم..

وظهر من الميلس.. وخلانا .. نتبادل نظرات الأستغراب أنا وسالم وقلت:

تصدق.. لو ما شفته بعيوني .. وما سمعت هالكلام يظهر منه..
كنت بقول أني أحلم..؟!! شنو هالانقلاب المفاجئ..؟!!

وتميت أعد على أصابع إيديني..
اليوم مو رمضان..
ولا عيد الفطر..
ولا عيد الأضحى..
ولا عيد الأم..
ولا عيد ميلادنا..
ولا عيد الفلاحين..


رد علي سالم عقب منفطس من الضحك : تصدق أنا متأكد أن أبوي يفكر بأخوه.. لأنه قال الكلام اللي بقلبه .. بس أثاري أبوي رقيق..

ضحكت ضحكة وحركت كتفه بإيدي وقلت : أسمع اللحين بسير بيت عمي بتسير ولا لأ..؟!!

رد الدم بويهه وقال : أكيـــد هذا ما يحتايله كلام يالطفس.. يالله خلنا نسير..

سرنا غرفنا وتجهزنا .. ويوم كنا ظاهرين.. سرت صوب ما أصف سيارتي


ولحقني سالم.. ويوم شفته يـبطل الباب اللي حذاي قلتله:
هي.. هي.. على وين ساير..؟!!

طالعني سالم وهو يعدل جلسته احذاي وقال: بسير وياك..؟!!يعني وين بسير..؟!!

طالعته وقلت وأنا أأشر بأصبعي : أطلع برع.. أنا ما بسير بيت عمي وبس..عندي مشاوير ثانية..
سير بسيارتك.. واسبقني وعقبها بلحقك هناك..
طالعني سالم وقال: أحسن..

تحرك الحبيب وهو شايل معاه أكياس..
وركب سيارته.. وراح متوجه لبيت عمي...

أما أنا تعرفون وين سرت قبل..؟!!

وشنهو المشوار المهم..؟!!

****************************** ****************

التوقيع

[عزيزي الزائر يتوجب عليك التسجيل للمشاهدة الرابطللتسجيل اضغط هنا]

.!{ X-MAN }!.

أيوه.. خطت الغريب..
عدلت الأكياس اللي ورى ويبتها احذاي.. طبعاً هذي اهي الأغراض اللي طلبها مني الغريب أني أشتريها..

وتوجهت لأحد البيوت اللي قريب من بيت عمي وسألت على بيت للإيجار..

طبعاً عقب ماخبرني الغريب أنه شاف بيوت فاضية من ذاك الصوب..

بعد ما دورت ودورت أخيراً لقيت بيت برح وحلو ويفصل عن بيت عمي بس حارتين.. والحمد لله..

أتفقت مع راعيه.. واستأجرت هالبيت منه وعطاني المفاتيح.. وبعد ما استلمت منه البيت..

سمعت صوت الأذان.. توجهت للمسيد وصليت.. وعقب ما خلصت..

رحت البنك.. وسحبت مبلغ كبير من اللي كنت حاطنه لوقت الضيق..

ورحت للأماكن اللي يبيعوا فيها الأثاث وأخترت أثاث كامل للبيت..
واتفقت مع شركة.. أنها تصبغ وتسوي ديكور لهالبيت..
من باجر..

ورحت.. لشركة ثانية تجهز الستاير على أحسن الأنواع.. المهم خلصت كل ترتيباتي لهالبيت..
وأن الأجراءات بتبدأ من صباح باجر..

ويوم خلصت كل شي.. توجهت لبيت عمي وكانت صلاة العشاء بعدها بتقوم.. فرحت للمسيد وصليت..


واتجهت صوب الميلس.. ودشيت وأنا شايل معاي أكياس.. وفواكه وبعض الشغلات لبيت عمي..

وأول ما دشيت.. سلمت على عمي ويوم طالع هالأغراض قال:
شنو هذا يامحمد..؟!!

طالعته وأوني عاد أرمس بذرابة وقلت : كل هذا من خير الله يا عم .. هالمقسوم إلكم..


وعقب ما شكرني ومدحني مثل العادة..حملنا الأغراض للبيت وداخل المطبخ.. ويوم شفت نورة سلمت عليها وعطيتها كيس وقلت:
أعذريني على القصور..

طالعتني وهي مستحية : مشكور يا محمد ليش كلفت على عمرك..؟!!

رديت وأنا أتمصخر : مو مشكلة تراج أختي الثانية.. ويوم طالعة عمي علشان أقوله صح كلامي..؟!! لقيت لون ويهه تغير.. وقال:
يالله علشان ندش.. صوب الرياييل..

المهم مشينا صوب الميلس.. ودشينا..وسلمت على عمي علي.. وعلى أخوي سالم.. ويلست شوي.. وبعدها مديت إيدي على الأكياس.. وخذيت كيس وعطيته عمي علي.. وقلت :

تفضل يا تاج راسي.. هذا الكيس لك..

طالعني.. وتعرفوا نظرة المتفاجئ..؟!! كان جذيه يناظرني وعقب سكوته قال:
لي أنا..؟!!

طالعته وقلت : هيه يا عمي خذه تراه لك.. وأسمحلي على القصور..

مد وأخذ الكيس عقب ما طلع روحي علشان يقبل به.. وقال والدموع تلمع بعينه: الله يعوضك خير يالطيب..

والله لو أخبركم.. أني حسيت دعوة عمي علي لي.. فتحت أبواب بحياتي أنا كنت غافل عنها.. طالعته وقلت وأنا ابتسم :

هيه يا عمي.. كثر من الدعاء.. تراني هذا اللي أحتايه..
ابتسم وهو ماسك الكيس.. مثل اللي يقول .. معقول.. حد يابلي شي..؟!!

ولفيت بويهي صوب عمي سالم وقلت :
أما أنت يابو.. نورة البنورة.. خذ هالكيس اللي أطلب من الله يعجبك..؟!! ومديت إيدي وعطيته..

وأخذ مني هالكيس وقال: والله لو كان عندي ولد ماكان عاملني شرات ماتعاملوني.. أنت وأخوك..

طبعاً اللي قطع هالكلام الحلو.. كان أخوي سالم وهو يقول:
عمي علي.. هذا الكيس لك.. وأنت يا عم سالم.. هذا لك..

ووقف وعطى كل واحد منهم مقسومه.. ورد ييلس مكانه.. طبعاً تم عمي علي.. يشكر بسالم وقال:
والله ما كنت أتمنى أني أكلف عليكم.. بس الله يجازيكم ما يجازي به عباده المسلمين..

رد عليه سالم وقال :
ياعمي.. ترانا عيالك.. حتى ولو رد أبنك من السفر.. بعدنا عيالك.. تراني من اللحين أحذرك..؟!! لا تسوي مثل المثل اللي يقول: من لقى أحبابه نسى أصحابه..؟!!

ولف سالم ويهه صوب عمي سالم وأخذوا يضحكون ويضحكون.. أما أنا طالعت على عمي علي.. اللي ذرفت عيونه دموع وقال:
مرد المقفي يلفي.. ياسالم.. مرده..وأنا عمك..

ويوم أنتبهوا على عمي أن عيونه يالسه تفضفض على الحريجة اللي ابها يسكن القلب..

قال سالم وهو يعتذر : أنا آسف يا عمي.. بس والله ما كان قصدي أكدرك.. بس..

طالعه عمي علي وهو يأشر بدينه لا ماعليك..

حبيت أرطب الجو أو بالأصح أنقذ الموقف اللي انجرح فيه عمي علي وقلت لأخوي سالم : ونورة البنورة.. ما يبتلها شي..؟!!

طالعني وهو يقول بعيونه.. ما كان قصدي أكدره..

وقمزت له بعيوني رد على كلامي فجاوبني وقال : لا يبتلها شي تحبه.. بس عقب بعطيها يوم بنسير عالبيت..

طالعه عمي سالم وقال : أشكرك على ذوقك يا سالم..بس.. ماعندي غير أقول الله لا يحرمني منكم ياعيالي..

سرقت النظر بإتجاه عمي علي.. ولقيته يمسح هالدموع محاول أنه يوقفهن..

عقب شوي.. طقت نورة الباب .. وظهر لها عمي سالم وعقب شوي قال:
تفضلوا وياي على الغرفة الثانية العشا ياهز..

وقفنا كلنا رباعه.. ومشيت صوب عمي علي وحاوطه بذراعي وقلت : كل واحد يمشي مع عمه ..

ضحكوا وهم يمشوا صوب الغرفة اللي محطوط فيها العشا وغسلنا إيدينا وقدمنا وتعشينا من أطيب الطبخات اللي أطبختها نورة.. البنورة..

وأول ما خلصنا الأكل وردينا الميلس.. أخذ عمي سالم وعمي علي.. يتكلمون عن زمان مقارنينه باللحين.. وطبعاً أنا وسالم ندافع عن هالجيل.. وأما أعمامي.. تموا يتمدحوا عن زمانهم..

والوقت أخذ يسرق أحلى لحظات أتمنى أنها تعود.. آآآآه لو تعود.. وبتشوفوا معاي.. عقب ليش أتمناها تعود..؟!!

أستودعناهم وتوجهنا للبيت أنا وسالم.. وأول ما وصلنا.. إلا اتجهت غرفتي بدون ماطالع سالم ..

****************************** ****************

التوقيع

[عزيزي الزائر يتوجب عليك التسجيل للمشاهدة الرابطللتسجيل اضغط هنا]

.!{ X-MAN }!.

(( سالم يتكلم ))

تشريت لنورة عطور رومنسية.. وكم قطعة من الحرير الخالص.. وتشريت لها البخور اللي يحبه القلب.. وخاتمين من ذهب وساعة نسائية..

أما عمي علي.. أشتريت له كم قحفيه وكم غتره وكم عقال.. واتشريت له ساعة للرياييل من النوع الزين.. وأن شاء الله تعيـبه..

أما عمي سالم.. تراه أبو الغالية.. أتشريت له ساعة.. وقلم ذهبي مع نعول من النوع الراهي واللي أن شاء الله يكون محط إعجابه.. وتشريت له هم بعد عطور..

مرت الساعات والساعات وتأخر محمد ، ويالله يالله إلين ما وصل لبيت عمي سالم.. عطينا الكل هداياهم.. ماعدى هديتي لنورة..

نورة يالغالية صدق أنج.. الغالية واللي مستحيل أفرط إبها لو شنو ما صار..


ويوم كنا بنسير طلبت من عمي ينادي نورة للباب الثاني علشان أعطيها الكيس.. وسار ناداها.. ولأول مرة.. أكون أنا ونورة واقفين بعيد عن بعض بس بروحنا..

وأول ما شفتها يت صوبي .. طالعت الأرض.. وأنا أتكلم :
نورة أشلونج..؟!!

سمعت صوتها اللي أشبه بالنسيم البارد على قلبي : الحمد لله على الصحة والعافية يا ولد عمي.. بس أنت أشلونك..؟!! أن شاء الله مرتاح..؟!!

جاوبتها وأنا عيوني على الأرض : لا الحمد لله.. مادمتي.. أقصد مادمتوا كلكم بخير أنا بخير..

وشوي عقب سكوت مر لفترة ثانيتين قالت :
أنزين سالم.. آمر.. ليش طلبتني..؟!!

يوم قالت هالكلمة.. أنا فكرتها تقصد شي ثاني.. رفعت راسي.. وكبرت عيوني وأحمر ويهي وقلت :
أنـــ......نـــا طلبـــ..بتج..؟!!

طالعتني وهي مستحية : هيه مو أنت قلت لأبوي.. سير أزقر نورة للباب الثاني أبيها..؟!!

ردت الروح لجسمي حزتها وقلت بصوت عالي : هيه أشوه.. على بالي..؟!! وسكت..

على بالك شنو يا سالم..؟!!

لا سلامتج.. بس حبيت أعطيج هالكيس.. وأن شاء الله ذوقي يعجبج يالغالية..؟!!

ومديت إيدي لها.. ترددت تاخذ الكيس.. فقلت لها :
لا ترديني.. والله نقيـتـلج كل شي على ذوقي.. يهون عليج أتعبي يسير على الفاضي..؟!!

ابتسمت ومدت إيدها وقالت : أرد العالم ولا أردك يابن عمي.. وخذت الهدية وطالعتني وقالت : سالم..؟!!

رديت عليها كأني مو مصدق أنها تزقر أسمي..!!!
آآآمري

ما يامر عليك عدو.. بس خذ مني هالشي.. أنا أتمنى ينال إعجابك.. بس أهو شي بسيط..مادري.. يمكن..؟!!

وأول ما مديت إيدي لها مقاطع كلمتها وقلتلها : وينه.. أكيد بيعجبني.. أن شاء الله.. يسد أنه منج..

وأول ماحطته بإيدي.. راحت بسرعة وبدون ماتقول مع السلامة..
بس يا زينج أنتي وهالشيلة اللي أحسها.. تكمل من جمالج.. يالطيبة..

ظهرت من هالباب وتوجهت للمكان اللي صاف به سيارتي

وأول ما كنت بركب السيارة.. لفت أنتباهي عمي علي وهو يطالعني ويقول:
في رعاية الرحمن.. ياعيالي..

ركبت وأنا أأشر بإيدي مع السلامة.. لكن عقلي.. تم يروح ويجي..
ليش أنا جذيه..؟!! ليش كدرت بمزاجه..؟!!

حشى هذا وولده مسافر سوى جذيه.. عيل لو كان ميت شنو موقفه..؟!!
استغفر الله.. أحسن أكمل هالدرب..وأنا ساكت

المهم مشيت بسيارتي ومحمد بسيارته إلين ما وصلنا للبيت..

بس يوم وصلنا حسيت محمد مو على بعضه.. حسيته.. يمشي جسد بلا روح يوم دش غرفته..

كنت أطالعه.. وأنا كان ألف سؤال وسؤال عن هالشايب..في راسي..
لكن محمد كان أسرع من هالسؤال علشان ينطرح..

دش غرفته.. وسمعت صوت مفتاحه يوم يتبند..

فتجهت لغرفتي وأنا شايل اللي بصدري.. معاي.. علشان أكمل فيه هاليوم..

****************************** ****************

التوقيع

[عزيزي الزائر يتوجب عليك التسجيل للمشاهدة الرابطللتسجيل اضغط هنا]

.!{ X-MAN }!.

(( نورة تتكلم ))

يوم عرفت أن عيال عمي بيون عندنا.. أستانست.. وسرت ويهزت الأكل والقهوة والشاي.. والعصير والمقبلات.. والعشا بديت به..

طبعاً قبل لا يوصلوا البيت.. رحت ولبست لباس واسع فضفاض.. ولبست هالشلة..

ويوم دشوا.. بديت أقدم كل مرة شي..
محمد.. أهو الوحيد اللي تأخر يوم يا البيت.. الكل توالفوا الساعة 5 ونص أو عقبه بشوي.. بس إلا محمد.. يا عقب صلاة العشاء..

بس يوم دش بهالأغراض.. حسيته مكلف على عمره.. بس تفاجئة يوم عطاني الكيس.. جدام أبوي وقال: يانورة البنورة..

بس معقول.. يكون.. يعرف أني أحب سالم..؟‍!! أكيد يعرف.. ولا ليش قال وهو يطالع بأبوي: أنتي مثل أختي..؟!!

أكيد أبوي تضايق ولا ليش.. تغير لون ويهه..؟!!

بس أحسن يظهر منه ولا مني.. بالذات شنو ممكن أقول :
أبي سالم..؟!!

حشى بنات القبايل مايرمسون جذيه ويخطبون لأعمارهم.. المهم خير أن شاء الله..

عقب ماقدمت لهم العشا.. وتعشوا وكانوا بيسيروا.. أستغربت من أبوي يوم دش عندي وقال:

نورة ولد عمج سالم يريدج بس صوب الباب اللي بالجهة الثانية..
سيري وأنا أبوج..

وسار عقبها أبوي للميلس.. أما أنا

توجهت لعند سالم.. وأنا ماسكة شي بسيط بإيدي سويته لسالم.. قلت متى مالقيته بروحه بعطيه إياها..


ويوم أقتربت لقيته يطالع على الأرض وسلم علي..


أخذت الكيس.. عقب تردد لكن.. الله لا يحرمني منه أن شاء الله..

والله استانست بكيسه أكثر من كيس محمد..

بس يوم عطيته اللي بإيدي وسرت..المطبخ أغسل هالمواعيين.. بدى فكري يروح ويجي..


بس على وين راح فكره يوم قلت : أنت.. طلبتني..؟!!


لا يكون استحى لأنه...؟!! يعني...؟!!
ظن أني أقصد الزواج... لايكون..؟!!
يالفضيحة.. آخر زمن..؟!! يا ويلي..!!

وسحبت إيدي علشان أحطها على فمي.. بدون منتبه على المواعين اللي كنت أغسلها..
أنكسر كم صحن.. على الأرض..أما أنا..يوم حطيت إيدي على فمي..
رسمت رسمة على ويهي بالصابون وأنا مادري..!!

بس أنتبهت على صوت أبوي يوم قال:
خير أن شاء الله.. أستوالج شي..؟!!

درت براسي صوبه وطالعته.. وأنا ويهي أحمر : لامافي..شي..

أخذ أبوي يمشي نظراتــه بالمواعين المكسورة على الأرض وقال : أنكسر الشر يا بنتي.. مو مشكلة فداج.. خلي عنج المواعين وعقب شوي بدش وياج وبساعدج..

رديت عليه : لا يا يبه.. ما يحتاي.. بس.. سير عند ضيفنا.. وأنا اللحين بلم اللي أنكسر..

وقبل لا يظهر طالعني وقال: بس قبل لا تلمي اللي انكسر..أمسحي هالرسمة اللي راسمتها بويهج بالصابون..وأنتبهي لا تجرحي نفسج

طبعاً سار وهو يضحك.. أما أنا.. كان نار بقلبي على الحركة اللي سويتها..


ما صدقت خلصت اللي بديني.. توجهت لغرفتي.. وبطلت الكيس اللي عطاني إياه سالم..
فديت اللي يابلي هالهدية الزينة..

وكملت يومي هذا وأنا أفكر.. وأفكر.. وأطالع بهالهدية الحلوة..
بس..

ممكن هديتي البسيطة.. تعجبه..؟!!

لميت الأغراض.. وغيرت ملابسي.. وفريت جسمي على الشبرية
يمكن أرقد على هالتعب اللي صار فيني..

****************************** ****************

التوقيع

[عزيزي الزائر يتوجب عليك التسجيل للمشاهدة الرابطللتسجيل اضغط هنا]

.!{ X-MAN }!.

(( العم علي ))

بعد ماساروا سالم ومحمد بيتهم.. تميت يالس أسولف ويا سالم العود..
وبعدها شوي.. تركني علشان أرقد وأرتاح..

أكيد بتسألون.. شنو حالتي عقب اللي قاله سالم أخو محمد..؟!!

آآآه.. أشلون ممكن تكون حالتي..؟!!

أب.. ولده قاطه في دار المسنين لمدة 35 سنة ويوم ظهر علشان يتأكد عن أحواله..؟!! يلاقيه بعد مجهود..
انسان ما قاصرنه شي والحمد لله.. بس بدال ما ياخذني بالأحضان..؟!!

أخذ يروغني من شركته..

معقول.. الواحد منا ما يصدق عياله يكبرون علشان يساعدوه أنه يكمل مشوار هالحياة..

لكن النكران كان آخر شي الواحد يتوقعه من عياله اللي هم من صلبه..

بس.. الشكوى لغير الله مذلة..


توجهت لفراشي.. اللي مفروش على الأرض.. ويلست عليه ومسكت هالساعة علشان أضبطها لصلاة الليل.. ويوم ضبطها.. طالعت هالأكياس اللي عطوني إياها عيالي.. سالم ومحمد..

أكيد بتسألوني بأي كيس ببدأ.. ؟!!

بديت بكيس ولدي سالم.. ويا زين اللي لقيته.. هدية طيبة والله..


أكيد بستغربوا ليش ما بطلت كيس ولدي محمد أول..؟!!

لكن.. الحكمة.. من تأخير كيس محمد.. أني حبيت أمتع عيوني باللي يابه لي قبل مرقد.. علشان تكون آخر شي شفته قبل لرقد..

ويوم بطلت الكيس.. اللي عطاني إياه ولدي محمد..

تفاجئة باللي كان محطوط..!!


لقيت علبة مزينة بالورود الطبيعية..ويوم بطلتها.. فاحت ريحة عطرة بالمرة ولقيت بوسطها..

القرآن الكريم..مزين من الغلاف بالذهب

ويوم رفعت القرآن..

لقيت تحته بس مغطى بأوراق الورد الجوري.. الملون.. كيس خمري من الحرير الخالص.. مشدود من أطرافه مثل الطرابيش..لونه ذهبي


ويوم بطلت هالكيس تعرفون شنو اللي لقيته..؟!!

لقيت مسبحة مصنوعة من الذهب.. ومنحوته على كل حبه من حباتها..
أسماء الله الحسنى..

تفاجئة ابصراحة بهالهدية اللي أنا متأكد أنها كلفته الألوف..

بس ليش يصرف علي.. بمثل هالمبلغ..؟!!

ويوم يـيــت أطالع بالورد اللي منثور داخل العلبة لقيت ظرف شكله وايد ظريف.. ويوم بطلته.. لقيته مكتوب.. بورقة صغيرة..

أن شاء الله تعيـبك.. هالهدية المتواضعة..

ابنك..
محمد حسن..

ولقيت بيزات تقريباً ألفين ..


أخذت هالبيزات ورديتها داخل الظرف ويالرسالة الصغيرة..وبستها

ومسكت هالمسبحة وحطيتها تحت مخدتي..

وأخذت القرآن اللي كانت كل صفحة من صفحاته متعطرة بأحلى أنواع العطور..
وأخذت أقرأ ما تيسر لي من القرآن..

إلين ما حسيت بالرقاد.. رديت القرآن داخل العلبة.. ورقدت لنص الليل وعقبها نشيت على صوت المنبه ورحت أتوضأ وعقبها صليت وأخذت أدعي لمدة طويلة وعقبها قريت القرآن حتى صلاة الفير..

وبعد.. صلاة الفير.. رقدت لين صباح هاليوم..

التوقيع

[عزيزي الزائر يتوجب عليك التسجيل للمشاهدة الرابطللتسجيل اضغط هنا]

.!{ X-MAN }!.

(( الجزء الحادي عشر ))



(( لحظات جميلة.. ))

((محمد))

يوم دشيت الغرفة رقدت وأرتحت.. والحمد لله .. وأنا أتريا صباح اليوم الثاني بفارق الصبر..


وفي صباح هاليوم اللي ترييته بطلوع الروح..نشيت.. الساعة 7 وتريقت وظهرت متوجه للبيت اللي أستأجرته لعمي علي.. ولقيت العمال.. حاطين أدواتهم.. اللي بيرتبوا فيه البيت..
المهم..

يلست أراقب.. وأقول حطوا هذا.. مابي هذا..

يعني أشرفت على صبغ البيت.. كله على بعضه..

وأول ما خلصنا.. راحوا العمال..

أما أنا.. اتصلت على الأهل.. وقلت لهم تغدوا أنا معزوم عند حد من الربع..

ورحت لأحد المطاعم.. ويوم ما خلصت الغدا.. توجهت لبيت عمي علي.. وأخذت أراقب وأراقب بهالصبغ..

ورديت البيت وسلمت على الوالدة.. ودشيت ورقدت..

المهم..
قضيت هاليوم على خير..


أما أخوي سالم.. كان فرحان بالإجازة اللي أتاحت له فرصة أكبر بزيارة عمي سالم.. أو بالأصح.. نورة..
أما.. أنا.. قطعت زياراتي عنهم بلا أي مقدمات.. وبقيت على اتصال مع عمي علي.. اللي كان يحن علي يبيني أزوره..

أستأذنته أني مشغول ببعض الأشغال اللي لازم أنهيها هالأيام.. في البداية ما كذبكم الخبر حسيت في صوته الخوف أني أهمله أو أتركه وانساه.. يعني خايف أني أرد له الصاع صاعين.. باللي سواه ولده.. مثل ماتعرفون..


المهم طمنته أني بطوف عليه قريب أن شاء الله بس أول ماتسمحلي الظروف..


بس من كثر مشاغلي.. ماحسيت بالأيام لدرجة..

أني توقعت مابشوف عمي غير كم يوم..
لكن مر نص شهر..وأنا لاشفت عمي ولاشافني.. مثل ماتعرفون صبغ والديكور وتأثيث البيت يباله وقت.. كنت أظهر من البيت الساعة 7 الصبح وما رد إلا الساعة 10 وطبعاً.. كل ما كنت أخلص من ترتيبات هالبيت ولقيت عندي وقت زيادة.. أسير.. وأكمل اللي أشوفه قاصر على البيت.. يعني من أثاث..أو أي شي ثاني


وكان حظي في هاليوم أني خلصت من وقت وما بقى غير بعض الشغلات البسيطة وأقدر أخلصها أو بالأصح أأجلها لباجر

ويوم شفت أن وقتي اليوم ما يشغله شي.. طالعت هالساعة اللي لقيتها تأشر بعده أن بداية الليل ما بدأ .. المهم.. رديت البيت.. تسبحت ودشيت صوب أهلي ويلست وتعشيت وياهم وعقبها دشيت غرفتي..ولبست لبس الرياضة.. وطلعت على طول وركبت سيارتي.. وتجهت للمكان اللي أحس أني قصرت بحقه كثير..


عرفتوه..؟!!


أيوه البحر..

تبون الصراحة.. حسيت شوقي كل ثانية وثانية يزداد لها الغريب.. معرف أشلون أوصفلكم أحساسي له.. أحسه ملاك.. وربي أرسله لي..

بس زين.. لو ألاقيه...؟!!

وأول ما وصلت لعند البحر.. حسيت بخوف في قلبي.. مادري..؟!!
خفت أني ما ألاقي الغريب.. بقيت بسيارتي يالس لوقت..

عقبها.. ظهرت من سيارتي بخطوات كلها شك.. وارتياب من أني ما ألاقيه..


سحبت أريولي سحب.. وأنا شايل هالعود.. إلين مقتربت قرب البحر.. حطيت العود على الأرض.. وفصخت الجوتي.. ورفعت البنطلون شوي .. علشان ما يتوسخ.. وتميت أتمشى عالتراب مرة.. وداخل البحر مرة.. أحساس ما بعده احساس..

البحر.. كان بارد.. والقمر.. كان هلال اليوم.. على حظي..

وأخذت أراقب بعيوني مدور على الغريب.. اللي صار أشبه بالروح للجسد..

بس حزني كان في محله.. مالقيته..


ويوم انقلب مزاجي لأن الغريب مو هنيه.. اقتربت لمكاني.. ومسكت هالعود.. وأخذت أغني.. وأدندن بالأوتار اللي كنت حاسه.. أنها أشبه بأوتار قلبي..


وأنا أغني.. طالعت على الهلال.. لقيت عيون الغريب مرسومة فيه..
رغم أني كنت يالس أدق بهالعود..
إلا فكري بالغريب.. أحتل حياتي وتفكيري اللي صار أشبه بدوامة بسبته وبسبب عمي سالم.. وعمي علي..

تأخرت وأنا كلي أمل بشوفت الغريب..

وساعة تجر ساعة.. حسيت أن الوقت يجبرني على أني أرد البيت.. لأن باجر.. عندي شغل لازم انهيه..

وقمت من مكاني.. والحزن.. تغلب على ملامح ويهي.. وشليت العود.. عقب مالبست الجوتي.. وتوجهيت صوب سيارتي.. وتحركت.. مبتعد شوي.. عن البحر.. ويوم كنت ببتعد أكثر.. لمحت شي عند البحر..
تحركت مثل الميـــنون ورديت للبحر.. وخرجت من سيارتي..
واقتربت..
لكن.. للأسف.. شكلي كنت أتخيل.. الغريب.. اللي معرف.. متى ممكن يرد.. وألاقيه..؟!!


رجعت بخيبة الأمل للبيت ودشيت غرفتي.. تسبحت ولبست بجامة النوم.. وحطيت راسي على المخدة.. علشان أرقد.. لكن ابصراحة..
تمنيت أشوف الغريب.. لأنه الشخص الوحيد.. اللي يمتص تعبي.. وغضبي من أي شي..

ومع تفكيري بالغريب.. غمضت عيوني متأمل أن النوم بيــيني.. وبيريحني.. من اللي أنا فيه..
بس اللي قطع علي فكرة النوم أن جوالي كان يدق..

بس منو المتصل..؟!!

معقول..يكون..؟!!


****************************** ****************

التوقيع

[عزيزي الزائر يتوجب عليك التسجيل للمشاهدة الرابطللتسجيل اضغط هنا]

.!{ X-MAN }!.

قفزت من فوق شبريتي.. وكنت بطيح.. واتجهت لصوب البنطلون اللي كان محطوط فوق الكرسي.. ودخلت ايدي بمخابيي أدور على الجوال.. بس مالقيته..

أخذت أدور.. وأنا خايف أن الأتصال.. أو الدقة بالأصح.. تتوقف..

وأنا كلي أمل أنه الغريب..

المهم.. وأنا أدور على الجوال.. لقيته.. داخل الكندورة.. اللي كنت لابسها قبل لاسير البحر..

وأول مستـلمت.. الجوال.. رديت بدون أي تركيز مثل المينون..

ألو....؟!!

الغريب..؟!!

وينك.. تكفى..؟!!

توقعت أسمع صوت.. لكن اللي تفاجئة منه سكوت في البداية.. وعقبها سمعت الصوت..


تعرفون منو كان المتصل..؟!!


كان عمي علي..


استغربت من اتصاله.. اللي ما كان عالبال.. وقطع فكري وتفاجئي.. صوته يوم قال :

السلام عليكم ورحمة الله وبركاته


رديت وأنا متفاجئ وخايف بنفس الوقت :
وعليكم السلام.. عمي علي..؟!!
خير فيك..فيك..شي..؟!!

لايكون تعبان..؟!!

عمي.. خير شو بلاك..؟!!


قاطع.. كلامي اللي كان أشبه بخوف الياهل.. وقال :

أنا زعلان منك..



بتصدقون.. لو قلـتـلكم.. أني تمنيت الأرض تنشق نصين وتبلعني قبل لايقول هالكلمة.. اللي ما توقعتها.. وبدون أي احساس رديت عليه :

ليش..؟!! شو بلاك ياعمي..؟!! تزعل مني أنا محمد.. ولدك..؟!!


جاوبني وصوته كله حزن:
ماكنت بتصل عليك في هالحزة.. بس..
مارمت أتريا لباجر..

والله لو ماكنت غالي علي.. ما كان ازعلي عليك.. هذا.. يحرمني من الرقاد..



سكت ماعرفت أرد.. ويوم لاحظ سكوتي.. قال :

حرمتني من لذة الرقاد يا محمد..


ماقدرت أتحمل هالكلام اللي أشبه بجلاد يجلد اظهري.. وقلت وأنا أحاول أتمالك أعصابي :

خير..؟!! ليش تقول جذيه..؟!! والله ياعمي.. كلامك.. هذا
مو سهل علي..


حد ضايجك.. خبرني..؟!! والله ما يسير خاطرك إلا طيب..




رد علي عقب ما ضحك ضحكة الزعل :

متأكد يا محمد بتاخذلي منه حقي ولو منو ما كان..؟!!


أكيد يا عمي علي.. وأنت بتشوف.. ولو منو ما كان..



جاوبني باجابته اللي ما توقعتها منه :

أنت..



سكت.. مادري.. شنو ممكن تكون اجابتي.. بس حسيت عمي علي شايل بقلبه مني حيل..عقبها قلت :

آمرني.. وأوعدك ماأتخلف عن اللي بتآمرني به يالغالي..



تعرفون أشلون أسلوب اللي يكون ماخذ بخاطره..؟!! المهم بها لأسلوب تم يرد علي :

أبيك.. تمر علي باجر.. وترجعني لدار المسنين..

هالإجابة بالذات كانت مثل الطراق على ويهي .. شنو ذكره بهالسالفة..؟!! صرخت بصوت عالي :
شنو..؟!!

دار..؟!!

دار.. المسنين...؟!!!

ليــــــــــــــــــــــــــــ ـــــــــــــــش..؟! !


سمعت صوته اللي أنا متأكد أن معاه.. دموع العين تدمع :
محمد.. نص شهر يالظالم..؟!!.. بدون ما شوفك.. وكل يوم أقول باجر بيــي..بس خوفي تسوي فيني شرات سوايا.. خالد..
وعمك.. المسكين.. يسده ظافني بهالبيت.. ويقولك يا محمد.. إذا حبيبك عسل.. خل منه وسل..
بس أنت.. حطيتني.. ونسيتني.. وأنا ماريد الحمل على عمك يزداد..


جاوبته وأنا زاد همي أكثر من قبل :
حشى والله ما نسيتك.. وحشى علي استوي شرات خالد..
أنت تعرفني زين.. وأشلون.. تقول..؟!!


قاطعني.. وقال:
كلمه ورد غطاها.. ردني.. دار المسنين..


جاوبته بكل حنية :

دار المسنين.. انساه.. سمعتني أنساه.. يالغالي
مالك مرده.. لدار المسنين.. ما دام راسي يشم الهوى.. سمعتني.. وأوعدك.. ما عيدها مرة ثانية.. سامحني عاد..؟!!

سمعت صوته عقب سكوت مر لفترة :
تصبح على خير..

حسيته يريد ينهي المكالمة وهو بعده زعلان بس ما خليه :
عمي.. لا تسكر وأنت زعلان..


صمم باجابته:
تصبح على خير..
في راعاية الله وحفظه..

ما قدرت أسوي شي.. غير أني أسكر..

وأنت من أهله يا عمي..

سكر عمي.. اللي عكر مزاجي.. زووود تعرفون شو سويت..؟!!

أخذت سويتش السيارة ورحت بالبجامة وتوجهت لبيت عمي سالم..وأول ما وصلت.. رحت متوجه صوب الميلس وأخذت أطق الباب الخارجي اللي يطل صوب الميلس..

بتقولون مينون..؟!! مافيني حشيمة..؟!! برايكم..
ترى إذا كان في شخص تحبه.. مستحيل ترقد اعيونك.. وهو زعلان منك..

المهم
بطل لي الباب عمي علي اللي تفاجئ من شوفتي.. تعرفون شنو كان موقفه..؟!!


أخذني بالأحضان وأخذ يـــبوسني بشوق.. والله شرات هالترحيب.. عمري مالقيت لا من أبوي ولا من أي شخص.. لدرجة أني شكيت.. معقول هو نفس الشخص اللي كلمني قبل فترة وزعلان.. ومعصب..؟؟!!!


مسك بإيدي ومشينا جنب لجنب
ودشينا الميلس..وهو ماسك فيني.. وقال عقب ما يلسنا :
آخر شي كنت أتوقعه أنك تيــيني بهالحزة..؟؟!




ضحكت وأنا أقول :
أشلون أصبر على زعلك والله موتي ولا تزعل مني..
غلطت.. وحقـك علي..بس يا عمي والله عذري معاي..



طالعني وهو يبتسم وقال:
ولا عذر يقـنعني ولو شنو ما كان.. والله كانت أعصابي تحترج يوم أشوف سالم وما أشوفك.. يا ولدي..كم بقالي من العمر علشان بتريا باجر وباجر..
بس يوم شفتك.. زعلي راح بحاله..



قمت من مكاني وتوجهت صوبه وقلت:
بعد الشر.. وبعد عمر طويل يا عمي..

ويوم يلست احذاه وهو كان يالس فوق فراشه قال عقب ما حط ايده على ايدي :

الموت حق.. مب شر يا ولدي..


رديت عليه عقب ما بست إيده :
عسى عمري قبل..

قاطعني يوم حط إيده على فمي وقال:
بعدك شباب والعمر جدامك أن شاء الله وربي يجبر بخاطرك.. يوم جابر بخاطري..




ابتسمت.. عقب ما سحب ايده.. وعقبها قال مثل اللي كان مو مصدق أنه تذكر يقول اللي يبيه قبل لا ينسى :


من متى والله أبي أكلمك بهالموضوع بس ما شفتك إلا اللحين..
يا ولدي.. ليش كلفت عمرك على الهدية اللي هديتني إياها...
والله أنت أولى مني بهالبيزات.. يمعلك علشان تعرس ببنت الحلال..



ضحكت وقلت:
أنت أهم من بنت ا