كيف ذبح أغلى من زوجتك يابن عدوان

--------------------------------------------------------------------------------



نمر بن عدوان

كثر الحديث عليه

وعن قتله لزوجته في روايه وتختلف في روايه اخرى

يقولون

وكفانا الله شر مايقولون

إن صديق لنمر بن عدوان سمع قصيده وهو بعيد عنه

القصيد المشهور والمراثي في زوجته وضحى

وكيف إنه ذبحها بالغلط وتحسر

من عقب موتها

وكان هو صاير عليه مصيبه أكبر من مصيبة نمر

وارسل الرجل هاذى قصيده لنمر بن عدوان

يوضح فيها ماجرى له

وان مصيبة نمر

ماهي شي قدام مصيبته

لعل ان نمر يتعض ويترك القصيد بـ وضحى

وقصيدته توضح ماجرى وابي اذكرها لكم

يقول الرجل هاذى

إنه كان راعي صيد

وأن ولده عمره تقريبا سبع او ثمان سنين

طلب منه مره من المرات

إنه يروح معه للصيد

وألح عليه

وافق الأبو وأخذولده للصيد معه

وكان معاه أعزكم الله حمار مركب ولده عليه

وهاذى هو يمشي على مهله

والولد راكب

يداري عليه ويعلمه كيف يكون قادر مثله على التحمل

وقفو عند شجره وقال لولده شف ياولدي

لا تحرك من عندك خلك بالظل

وكان الجو حار

يوضحه بقصيدته يوم يقول

صايد حبر والحر زايد بشدي

(حبر)يعني طير الحباره

راح الأبو يدور الصيد

وخلا ولده قاعد

ويلقى ريم ضبي

لاكن شمت ريحه من بعيد وجفلت

وهاذى هو با لوادي على مهله

والوادي كان مليان رمث

يدور وراها

ويمين ويسار

ويلقى ذيك الحباره تدورج بين الشجر

وتروح مره يمين

ومره يسار

وهو يزحف معها ومتبورد عليها

وكانت بارودته إسمها مغيضه يقول

كانت مغيضه ماتغالط بيدي

والقلب من ثور الدخن يانمر خاف


وتخبت الحباره ورى الشجر ماشافها

وعارف إنها بين الشجر

بس مايدري وين

بالحضه هاذي قام ولده من تحت الشجره

وقام يتمشى بين الشجر

تعب من الحر

وجلس تحت ظل صغير

وكان لابس شماغ الولد ولونها رصاصي

شاف الأب شي يتحرك

وكأن الحبارى ناسفه جنحانها على راسها

عن الشمس

يقول

طليت كن طير الحبارى مهدي

وناسف جناحه من على الراس رف راف

وهو يمد بارودته

ويضبط العيار

على الحبارى

وهو يثور بندقه

ويجي ركض يبي صيده

يوم جا

ولاه ولده متمدد على الأرض

ودمه يقطر

ولنه صايبه مع قلبه

يقول

جيته ولا انه نور عيني ممدي

ودمه حمر من بصرة القلب نزاف

شال الولد على الحمار

ويقاله شهري

يقول

ركبت شهري يقطع الدو بـ اسلاف

قبل يوصل البيت وقف بوادي

وربط الحمار بعيد عن البيت

وجا عند حرمته

قال لها

انا صدت صيده ماصادها قبلي إنسان

وحلفت ماتنطبخ إلا بقدر ناس مامات عندهم احد

روحي ودوري بالنزل قدر ناس ما مات عندهم احد

راحت دورت مالقت

كل ماجات عند احد

قال مات عندنا ميت

اللي تقول اخوي واللي تقول ابوي واللي ولدي

رجعت وقالت مالقيت

لاكن انت طلبك غريب

فلان وينه

تعني ولدها

قال صاحب الأمانه منهو

قالت الله سبحانه

قال اجل صاحب الأمانه أخذامانته

واستعيني بالصبر

ارسل القصيد مثل ماذكرنا بالبدايه

ووصلت القصيده لنمر بن عدوان

وفهم وعرف إن من شاف مصيبة الناس

تهون عليه مصيبته

وترك القصيد بزوجته وضحى

القصيده

ماني حافضها كلها لاكن اجيب اللي الله يقدرني عليه

يقول





ياراكب اللي فوقهـا الكـور شـدي
قم يانديمي وأعتلـي فـوق هيـاف
وإنسف عليها الخرج في ما تمـدي
أسرع من اللي بالسمى له ترف راف
ودي تـزور الهنـد والسنـد ودي
وتدور بالدنيا مـن الكـاف للكـاف
ويم نمر بن عـدوان يالقـرم ودي
علم لفانـي يـودع القلـب ينـلاف
يانمر وين اللي بنـى قصـر شـدي
وين الضياغم يانمر وين أهل كـاف
يانمر قبلـك مـرود العيـن مـدي
والعين لجله تـذرف أزواج وأرداف
قانـص ريـامـه يانمربالتـهـدي
الريم زاغ وقـارف الريـح نسـاف



إلا ان قال





طليت كـن طيـر الحبـارى مهـدي
وناسف جناحه من على الراس رفراف
حفيـت عـدوي قاصـد لـه مقـدي
مولع الفتيل ونتاهـض لـه بالكتـاف
كانـت مغيضـه ماتغـالـط بـيـدي
والقلب مـن ثورالدخـن يانمرخـاف
جيتـه ولنـه نورعيـنـي مـمـدي
ودمه حمر من بصرة القلـب نـزاف
شلته وحطيتـه علـى فـوق زنـدي
وركبت شهري يقطع الدو بـأسـلاف
لـم الولـد لـه قلـت يابنـت لـدي
ترى صيدتي ماصادها قبلـي أسـلاف
يـم العـرب يابنـت قومـي ومـدي
وهاتي قدر ماطره البيـن بـأطـراف
راحت وصاحـت وكثـرت بالتصـدي
وقالت ماأضن عزرائل لحـد لـه لاف
طير النيـا فـي كـل ديـره مهـدي
يشرف على المخلوق بحقوق وإنصاف



اتمنا ان يعجبكم ماقدمت

إعذرونا من القصور

وتقبلو ودي

و

إحترامي



منقوووووووووووووووووول

ألم بعد امل

ألف شكر على القصة الشيقة

وعذوبة السرد